Maanta waxaan halkaan ku lafa guri
doonnaa farqiga u dhaxeeya eedeysane iyo dambiile, waana mid ka mid ah
maqaalladeennii la xiriiray arrimaha dembi barista.
Waa kumaa
Eedaysane?
Eedeysane waa qof lagu eedaynayo
fal-dembiyeed dhacay hase yeeshee aan weli xukun Maxkamdeed oo kama dambeys ahi
ku dhicin isla markaana kiiska uu ku eedaysan yahay ay baaristiisu socoto,
sidaa awgeed waxaa reebban in qof eedaysane ah loogu yeero ama lagu tilmaamo
dembiile xataa haddii uu qiraal ku yahay inuu galay fal-dembiyeedka ama caddeyn
buuxda loo hayo inuu galay dembiga loo haysto, ilaa maxkamadi xukun kama
dambeys ah ku riddo, markaana waxaa uu noqonayaa dembiile.
Waa kumaa
dembiile?
Dambiile waa qof lagu helay dembiga
lagu soo oogay isla markaana maray dhamaan hab raacyada ay maraan kiisaska
ciqaabta ah kuna dhacay xukun kama dambeys ah, kuna dhawaaqay garsoore awood u
leh ku dhawaaqista xukunkaas kama dambeysta ah.
Waa maxay
habraaca dacwadaha ciqaabta ah?
Si eedeysanaha loogu yeero dembiile
waxaa lagama maarmaan ah in la helo dhowr arrimod ama dhowr tallaabo:-
In uu soo maray Maxkamadaha darajada
koowaad, Maxkamadaha darajada koowaad waxaa la isku dhahaa Maxkamadaha
Degmooyinka iyo Maxkamadda Gobolka, kiiska ciqaabta ah haddii uu ka billowdo
Maxkamadda degmada ee lagu qanci waayo waxaa la aadayaa Maxkamadda darajada
labaad ee lagu magacaabo Rafcaanka, sidoo kale Maxkamadda Gobolka go’aanada ka
soo baxa haddii lagu qanci waayo waxaa la aadayaa Maxkamadda darajada labaad ee
loo yaqaan Rafcaanka, Maxkamadda Rafcaanka waa darajada labaad haddii lagu
qanci waayo xukunka ay ridday waxaa laga sii aadayaa Maxkamadda Sare ee Dalka,
markii la soo maro habraacyadaan oo dhan laguna helo eedeysanaha dembiga loo
heystay wuxuu noqonayaa dembiile.
Si eedeysanaha dembiile loogu yeero
waa in uu maraa saddexdaan maxkamadood oo ay xukun kama dambeys ah ku riddaa
Maxkamadda sare ama xukunkii Maxkamadda darajada koowaad ay ridday ay ka soo
wareegataa muddo 30 maalmood ah oo ka billaabaneyso maalinta lagu dhawaaqo
xukunka si toos ah eedeysanaha wuxuu noqonayaa dembiile.
Sidoo kale xukunkii Maxkamadda
darajada labaad ay ridday ay ka soo wareegataa muddo 30 maalmood ah oo ka
billaabaneyso maalinta lagu dhawaaqo xukunka dacwadda, si toos ah eedeysanaha
wuxuu noqonayaa dembiile., iyadoo aan la marin marxaladahaan eedeysanaha
looguma yeeri karo dembiile, inta ka horreysana waxaa loogu yeerayaa eedeysane.
Maxaa laga wadaa garsoore awood u
leh.
Garsoore awood u leh waxaa laga
wadaa in uu ahaado garsooraha qaadaya garta ama dhageysanaya dacwadda ciqaabta
ah ahaadaa:-
Garsoore magacaaban oo u idman in uu
soo saaro xukun Maxkamadeed.
Garsoore u idman qaadista ama ka
garnaqista culeyska ama xajmiga uu leeyahay kiiska.
Garsoore fadhiya maxkamaddii loo
magacaabay, tusaale haddii garsoore loo magacaabo Garsooraha Degmada Xamarjajab
awooddiisa waxay ku egtahay xudduudda degmada loo magacaabay, kama gar naqi
karo kiis ka dhacay Degmada waaberi ee Gobolka Banaadir, degmooyinka dalkana
waa sidaas oo kale.
Garsoore fadhiya maxkamaddii loo
magacaabay, tusaale haddii garsoore loo magacaabo Garsooraha Maxkamadda Gobolka
Shabeelaha Hoose awooddiisa waxay ku egtahay xudduudda Gobolkaas loo magacaabay
maxkamadiisa, kama gar naqi karo kiis ka dhacay Gobolka Banaadir, gobollada
dalkana waa sidaas oo kale, awoodaha maxkamadaha dalka waxaan uga hadli doonaa
maqaal kale si dhameystiran.
Eedeysane waa qof lagu eedaynayo
fal-dembiyeed dhacay hase yeeshee aan weli xukun Maxkamdeed oo kama dambeys ahi
ku dhicin isla markaana kiiska uu ku eedaysan yahay ay baaristiisu socoto.
Dembiile waa qof lagu helay
fal-dembiyeed dhacay hase yeeshee uu ku dhacay xukun Maxkamdeed oo kama dambeys
ah isla markaana maray marxaladaha aan ka soo sheekeynay.
Gabagabo
Maanta waxaan halkaan ku joojineynaa
maqaalkii aan ka qornay farqiga u dhaxeeya eedeysane iyo dembiile, aqristaha
sharafta lahow haddii aad qabto su’aal waxaad noogu soo diri kartaa formka
hoose, annagana waa kaaga soo jawaabi donna, haddii aad talo noo heysidna waan
tixgelin doonnaa idim Alle.
0 Comments